د ځانمرګو بریدګرو له کورنیو سره د ۱۲ میلیارډ افغانۍ د مرستو په اړه، د ذبیح الله مجاهد څرګندونه
د طالبانو ویاند ذبیح الله مجاهد د ځینو رسنیو هغه راپورونه رد کړل، چې وايي دې ډلې تېر کال یوازې د خپلو ځانمرګو بریدګرو له کورنیو سره ۱۲ میلیارده افغانۍ مرسته کړې دي. مجاهد نن ماښام (چارشنبې د وری ۱۳مه/ ۲ د اپریل) خپله اېکسپاڼه په یوه وضاحت کې ویلي دي چې دا پیسې د هېواد په ټولو یتیمانو، کونډو او معلولینو کورنیو ته ورکړل شوې دي.
د هغه په وینا، په ټول افغانستان کې د طالبانو سره ۶۵۳ زره ۳۶۵ یتیمان، کونډې او معلولین ثبت دي. نوموړي څرګنده کړه چې ۱۶۷ زره ۶۴۵ تنه یې د هغو کورنیو غړي دي، چې د تېرو شلو کلونو جګړو کې د طالبانو په ملاتړ وژل شوي دي. د دې تر څنګ، د پخواني جمهوري حکومت د نظامیانو ۱۲۲ زره ۲۹۹ کورنۍ هم د دې مرستې برخهمند شوي دي.
مجاهد زیاته کړې ده چې د عامو او طبیعي یتیمانو، کونډو او معلولینو شمېر ۳۶۳ زره ۳۲۱ تنو ته رسيږي او تېر کال د دوی لپاره ۱۲.۵ میلیارده افغانۍ بودیجه تخصیص شوې وه. هغه د رسنیو په ځواب کې لیکلي دي: «دا مرستې ټولو ته پرته د توپیر په پام وېشل شوې دي.»
په همدې اړیکه، د طالبانو د ځانمرګو بریدګرو دقیق شمېر ناڅرګنده پاتې دی، خو د دوی د ډلې په بریدونو کې په تېرو ۲۰ کلونو کې زرګونه افغانان وژل شوي دي.
د طالبانو دا ځواکونه د پخواني حکومت پر وړاندې د جګړې په بهیر کې د پوځي اډو او دفترونو په بریدونو کې کلیدي رول درلود او اوس هم طالبانو د خپلو ځانمرګو بریدګرو کنډکونه ساتلي دي.
