په غور ولایت کې د طالبانو ځایي چارواکو د جام منار له اړوندې سیمې څخه د ۴۰بېلابېلو تاریخي اثارو د کشف خبر ورکړی دی.
په غور ولایت کې د طالبانو د اطلاعاتو او فرهنګ ریاست لهخوا نن شنبه د غبرګولي پنځمه د مې ۲۵مه نېټه، په خپره شوې خبرپاڼه کې راغلي چې دا تاریخي اثار د وروستیو سېلابونو په پایله کې د جام منار له اړوندو تاریخي سیمو څخه کشف شوي دي. خبرپاڼې زیاته کړې چې یاد اثار د غور ولایتي موزیم ته سپارل شوي دي.
په غور کې د طالبانو د اطلاعاتو او فرهنګ رئیس عبدالحی زعیم رسنیو ته په خبرو کې ویلي چې کشف شوي اثار د غوريانو دورې پورې اړه لري چې د لرغونپوهانو د یوې ډلې لهخوا به وڅېړل شي.
د دې تاریخي اثارو د ډول په اړه زیات معلومات نه دي ورکړل شوي، خو په خپرو شویو انځورونو کې خاورین لوښي لیدل کیږي.
