د برتانیې د ځانګړو ځواکونو پخوانیو غړو په افغانستان کې د دوی د جنګي جنایتونو پرده پورته کړه
په یو افشاکونکي راپور چې د بیبیسی پانوراما پروګرام لخوا خپور شوی، د برتانیې د ځانګړو ځواکونو یو شمېر پخوانیو غړو، لومړی ځل لپاره چوپتیا ماته کړې او د خپلو همکارانو له لورې په عراق او افغانستان کې د ادعا شوو جنګي جنایتونو پرده پورته کړې. دا شهادتونه چې له ۳۰ زیات پخواني سرتېري یې وړاندې کوي، د ناسمې وژنې، د ماشومانو اعدام، او د جرم صحنې بدلولو جدي تورونه لري.
د بریتانیا د ځانګړو هوایي خدماتو (SAS) او د شاهي سمندري ځانګړو ځواکونو (SBS) پخواني سرتېري بیبیسی ته ویلي چې د بندیانو په خوب کې وژل، د اجسادو ترڅنګ وسلې ایښودل تر څو حقیقت پټ شي، او د وژل شوو کسانو د شمېرلو په اړه سیالي کول، د دوی د عملیاتو یوه عادي برخه وه. د دې ځواکونو یو غړي څرګنده کړې چې د بندیانو وژل یوه «عادي کړنه» ګرځېدلې وه.
راپور زیاتوي چې هغه ماشومان چې خطر نه و، په ډزو وژل شوي، او د عملیاتو غړو داسې صحنې جوړولې چې وژل شوي کسان وسلهوال ښکاره شي. یو پخواني سرتېري ویلي، ځینې سرتېري «ذهني ناروغان» وو او د وژلو نه خوند اخیست.
شهادتونه څرګندوي چې دا کړنې یوازې د ټیټې کچې نه وې، بلکې لوړپوړي قوماندانان هم پرې خبر وو، او ځینو نظامي حقوقي مشاورانو د جعلي راپورونو په لیکلو کې مرسته کړې تر څو د رسمي څېړنو مخه ونیسي.
راپور همداراز څرګندوي چې د برتانیې هغه مهال لومړي وزیر، دیوید کامرون، څو ځله د افغانستان د ولسمشر حامد کرزي له خوا د ملکیانو د وژنې په اړه خبرداری ترلاسه کړی و، که څه هم د هغه دفتر دا رد کړې.
د برتانیې دفاع وزارت په غبرګون کې ویلي چې د روانو علني څېړنو پوره ملاتړ کوي او له ټولو پخوانیو سرتېرو غواړي چې خپلې معلومات وړاندې کړي. سره له دې، اوسني تحقیقات یوازې درې کلنه موده رانغاړي، خو دا شهادتونه له یوې لسیزې زیاته موده پوښي.
دا افشاګري داسې مهال شوې چې د استرالیا یو شمېر ځواکونه هم د افغانستان په ماموریت کې د جنګي جنایتونو په تور تورن شوي دي.