د طالبانو سترې محکمې اعلان کړی چې د کوچني اختر په مناسبت دوه زره څلور سوه درې شپېته بندیان د دې ډلې له زندانونه خوشې شوې دي.
د طالبانو د سترې محکمې په اعلامیه کې چې نن (شنبه، ۹ د وری / د مارچ۲۹مه) خپره شوې راغلی چې د طالبانو مشر هبت الله اخوندزاده د فرمان پر بنسټ، د درې زره یو سوه دوه پنځوسو نورو بندیانو د بند موده هم کمه شوې ده.
سترې محکمې د اعلامیې له مخې، د بندیانو بخښل او سزا کمول د یو ځانګړې کړنلارې پر بنسټ ترسره شوې دی.
د طالبانو د زندانونو د چارو د تنظیم ادارې رئیس، احمد یوسف مستري وویل چې اوس مهال د دوی په زندانونو کې ۱۱ زره کسان بندي دي چې په دې کې ۱۰۰۰ ښځې او نږدې ۷۰۰ کوچنيان شامل دي. د هغه په خبره، تیر کال د طالبانو په زندانونو کې له ۲۰ زرو ډیر کسان ساتل کېدل.
دا لومړی ځل نه دی چې طالبان په مذهبي اخترونو کې بندیان خوشې کوي. د زندانونو د ادارې په وینا، تیر کال په کوچني اختر او لوی اختر کې په ټولیزه توګه ۳۲۰۰ بندیان خوشې شوي وو.