د نجونو په زده کړو بندیز؛ یونسف: د زدکړي نه محرومو نجونو شمېر ۲.۲ میلیونو ته ورسید
د ملګرو ملتونو د ماشومانو ملاتړ صندوق (یونیسف) وايي، په افغانستان کې د نجونو په زده کړو بندیز له امله ۴۰۰ زره نورې نجونې هم د نوي ښوونیز کال په پیل سره د ښوونځي څخه محرومې شوې دي، چې په دې سره یې د محرومو نجونو شمېر اوس ۲.۲ میلیونو ته رسېدلی دی.
کاترین راسل، د یونیسف اجرایوي مدیره، نن شنبه، د وری ۲مه(۲۲ دمارچ) په یوه بیانیه کې وویل: «دا بندیز د میلیونونو افغان نجونو راتلونکی تیره کوي. که چېرې دا حالت تر ۲۰۳۰ ز کال پورې دوام وکړي، له څلورو میلیونو څخه زیاتې نجونې به د لومړني ښوونځي وروسته له زده کړو بې برخې وي.»
نوموړې دې بندیز ته «ناوړه او ناورینونکې» وبلله او ویې ویل چې دا به د افغانستان په روغتیا سیسټم، اقتصاد او ټولنه منفي اغیزه ولري.
راسل ټینګار وکړ چې د نجونو د ناپوهېدو له امله، د ماشومتوب ودونه، د روغتیا ستونزې او د ښځینه ډاکټرانو کمښت د ټولنیزې کړکېچنې لامل ګرځي.
هغې وویل: «موږ اټکل کوو چې په کال کې ۱۶۰۰ مېندې او ۳۵۰۰ ماشومان مري. دا یوازې شمېرې نه دي، بلکې د ژوندونونو له لاسه ورکولو او د کورنیو د ویرولو نښه ده.»
د بندیز سره سره، یونیسف د ټولنیزې زده کړې له لارې ۴۴۵ زره ماشومانو ته د زده کړو زمینه برابره کړې ده، چې ۶۴٪ یې نجونې دي. راسل د طالبانو څخه وغوښتل چې د نجونو په زده کړو بندیز فوراً لغوه کړي: «زده کړه یو بنسټیز حق دی او د یوې روغه او باثباته ټولنې لپاره اړینه ده. افغانستان نشي کولی د خپل نفوس نیمایي برخه شاته پریږدي.»
دا د طالبانو د واکمنۍ له پیل راهیسې څلورم ښوونیز کال دی چې نجونې له شپږم ټولګي څخه پورته ښوونځیو او پوهنتونونو ته د تګ حق نه لري.
طالبانو د نوي کال په پیل کې بیاځلي د بندیز تائید وکړ، په داسې حال کې چې نړیوالې ټولنې د دې سیاست په څرګند ډول غندلی دی.
