یوناما: د پاکستان ضربالاجل د پای ته رسیدو وروسته د افغان کډوالو جبري راستنیدل زیات شوي دي
په افغانستان کې د ملګرو ملتونو د مرستندویه پلاوی (یوناما) وایي چې د پاکستان حکومت لخوا افغانانو ته په خپله خوښه د تللو یا جبري ایستلو ضربالاجل څخه وروسته، له دغه هېواد څخه د جبري ستنیدو د کچې زیاتوالی ثبت کړی دی.
یوناما نن (چهارشنبه ۲۰ د وری/ د اپریل ۹مه ) په خپل ایکس پاڼه کې لیکلي چې په تېرو دوو ورځو کې د پاکستان نه د ۸ زره نه زیاتو افغانانو چې د اقامت سند نه لري، جبري راستنیدل شوي دي.
یوناما لیکلي: «په تېرو دوو ورځو کې ۸,۰۲۵ افغانان چې د اقامت سند نه لري یا د موقتي پېژندنې کارت (ای.سی.سی) لري، د تورخم او سپین بولدک په سرحدي دروازو له لارې افغانستان ته راستنول شوي دي.»
یوناما وایي، نړیوال کډوالې سازمان (آی.او.ام) او د دې سازمان شریکانو تر اوسه ۲,۶۱۴ کسانو ته په بیړني استوګنې، اوبو، خواړه او صحي خدماتو کې مرسته کړې ده.
دا راستنیدل د دې تر شا زیات شوي چې د پاکستان حکومت د ۲۰۲۵ کال د مارچ تر ۳۱ نیټې پورې د افغانستان د هغو وګړو ته چې د قانوني اقامت اجازه نه لري، خبرداری ورکړی و چې باید د دې هېواد خاوره پریږدي یا به د جبري شړل سره مخ شي.
په ۱۴۰۰ کال کې د جمهوري حکومت د سقوط وروسته، ګڼ شمېر د پخواني حکومت کارکوونکي، د مدني ټولنې فعالان، بشري حقونو مدافعین، خبریالان او نور هغو ډلو چې د طالبانو له لوري د انتقام ګواښ سره مخامخ و، پاکستان ته پناه وړې وه.
څو ورځې مخکې د ملګرو ملتونو یو شمېر کارپوهانو په ګډون د ریچارد بنت، د دې سازمان د افغانستان لپاره د بشري حقونو ځانګړی راپورچې، له پاکستان غوښتنه وکړه چې د افغان کډوالو جبري شړل دې وځنډوي ځکه چې هغوی په افغانستان کې له ګواښونو سره مخ دي.
