د اتلانو جام د لوبو په لړ کې د افغانستان کرکټ ملي لوبډلې وکولای شول چې انګلینډ ته په اوو منډو ماتې ورکړي او په دې سره یې په دې جام کې لومړۍ لوبه وګټله.
د انګلینډ او افغانستان ترمنځ لوبه نن (چهارشنبه، ۸ د کب/د فبروري ۲۶مه) د لاهور په قذافي لوبغالي کې ترسره شوه. افغانستان لومړی توپ وهنه وکړه او انګلینډ ته یې د اوو لوبغاړو په سوځېدو ۳۲۶ منډې هدف ورکړ. که څه هم د افغانستان د توپ وهنې پیل ښه نه و، خو ابراهیم ځدراڼ وکولای شو چې ۱۷۷ منډې وکړي او د محمد نبي تېزې توپ وهنې هم د ښه هدف ټاکلو کې مرسته وکړه.
ابراهیم ځدراڼ د افغانستان لومړی لوبغاړی شو چې په نړیوال جام او اتلانو جام کې یې سلیزې وکړې.
انګلینډ لوبډلې د لوبې تر وروستیو غځوله او جیو روټ ۱۲۰ منډې وکړې. خو عظمت الله عمرزي د پنځو انګلینډي لوبغاړو سوځولو سره د انګلینډ د بریا مخه ونیوله او په پنځوسم اور کې یې د ۳۱۷ منډو په ټولولو سره لوبه وګټله.
محمد نبي، عظمت الله عمرزي، راشد خان او ګلبدین نایب هم یوه-یوه ویکیټ تر لاسه کړه.
افغانستان مخکې خپله لومړۍ لوبه جنوبي افریقا ته بایللې وه. انګلینډ په دې ماتې سره د اتلانو جام څخه ووت او که افغانستان په راتلونکې لوبه کې اسټرالیا ته ماتې ورکړي، نو کولی شي نیمه پایلوبو ته لار پیدا کړي.